政情：陳茂波換新車 無端端破財
財政司司長曾俊華喺啱啱公布嘅財政預算案中，大幅調高新車首次登記稅及煙草稅，唔少立法會議員頓成苦主。
立會煙民叫苦
會計界陳茂波（Paul）亦係受害者，事關佢架車揸咗十一年，去年十二月一心換車，無奈新車要四月先交收，依家就焗住畀多筆新車首次登記稅。阿Paul話鬍鬚曾突然加稅乃出乎意料，但都無可奈何喎。
眾所周知，社民連梁國雄（長毛）同民建聯黃定光都係議會大煙鏟，政府突然將煙價加到每包四十九蚊，搞到佢哋成為受害者。長毛仲批評鬍鬚曾剝削煙民嘅吸煙權利，仲揚言不排除號召煙民上街抗議。
每日食成三十支煙嘅長毛直言，政府一開始想禁煙，係為保障市民唔使吸二手煙；既然依家好多地方已經禁咗煙，政府無理由再加稅懲罰煙民。佢揚言，如果政府真係咁為市民健康着想，倒不如開徵味精稅同反式脂肪稅好過。