財政司司長曾俊華炮製嘅新一份財政預算案尋日出台，一如所料庫房水浸，有七百幾億盈餘。口口聲聲話唔鍾意派糖嘅財爺曾俊華，今次又派近六百億糖，明顯自打嘴巴，例牌畀班立法會議員鬧爆，只係睇吓邊個鬧得激啲、鬧得高手啲咁啫。職工盟立法會議員李卓人鬧曾俊華係跛腳鴨政府都唔夠，要升級成跛腳肥鴨先足以表達不滿。
其實唔少人都批評預算案反映港府係看守政府，阿人不妨再下一城，用「跛腳肥鴨看守政府」，相信更加貼切。