政情：悶足兩個鐘議員局長齊搵周公
鬍鬚曾尋日公布嘅最新一份預算案只得小恩小惠，老百姓睇直播激到無晒癮，但身處會議廳嘅一眾高官、行會成員及立法會議員就畀鬍鬚曾悶親，捱呢兩個鐘仲慘過上斷頭台。既然鬍鬚曾無新猷，各人自然搵事做打發時間，有人瞌眼瞓，有人睇新聞，仲有人周圍撩人傾偈，更有人索性閂埋耳仔處理文件好過。
曾德成擘大口得個窿
近二百段嘅預算案悶到出油，十二個政策局局長到場齊撐鬍鬚曾，但個個力有不逮。教育局局長孫明揚首先棄守，唔夠半個鐘就開始瞌眼瞓，保安局局長李少光、政制及內地事務局局長林瑞麟（林D9）緊隨其後，搵周公去也，林D9仲瞓到差啲跣落枱面。民政事務局局長曾德成亦都失晒儀態，瞓到擘大口得個窿。
而坐喺公眾席嘅行會成員同副局長亦唔好得幾多，梁智鴻托住個頭瞓覺，劉遵義同李業廣亦閉目養神，其他唔係睇iPad就係玩電話，冇乜人有心機聽。
不過講到瞌眼瞓之冠，一定唔及各位尊貴嘅立法會議員嘞。黃宜弘頻頻打呵欠；黃定光就先玩電話、後索性瞓埋；黃容根不斷同黨友陳克勤傾偈過日辰；李國麟就喪刨剪報；其他泛民議員則埋頭研究用嚟抗議缺乏全民退休保障嘅道具拖鞋同揮春，可見鬍鬚曾嘅預算案幾咁無聽眾！