政情：鬍鬚曾炮製史上最廢預算案

鬍鬚曾以外行人領導港府財金系統，做得好唔好，有目共睹，尋日份預算案對刺激經濟同利民紓困，毫無驚喜，市民一啲唔出奇。好似中間講支柱產業部分，足足十二版共四十五段，全部翻叮以前施政報告同預算案內容，咁都算嘞，但近期沉醉於個個星期日喺私人網誌大放厥詞嘅鬍鬚曾，竟然將預算案當寫Bolg，一味吹水唔抹嘴，浪費紙張，浪費大家時間，咁就令人忍無可忍。

自創新詞 無人睇得明

古有倉頡造字，今有鬍鬚曾自創中文新詞新句式。講到政府嘅角色，鬍鬚曾話：要「賦權予大家發揮所長」。提到市場同政府關係，佢話：「喺大市場、小政府之間，香港有一個活躍的大社會。」講到關顧民生，佢話：「無論經濟順逆，都重視每一位香港市民的價值。」究竟鬍鬚曾講緊乜，相信無乜人睇得明。

去到結語部分，鬍鬚曾來個廢話總爆發，十段文字全部廢噏，全部高、大、空，好似「讓每一位香港市民盡展所長，追尋自身的價值和幸福，就是符合香港最大利益的做法」。又好似呢句：「單單是經濟強大，不足以令一個城市變得偉大，同樣重要的，是社會開放多元，市民透過理性對話，一起解決問題。」呢兩句字面睇得明，但最唔明嘅係，廢話講咁多為乜！

面對呢份史上最廢預算案，議事堂內嘅議員唔止釣魚放蚊，部分索性中途離席，用腳抗議鬍鬚曾疲累轟炸。民主黨李華明、李永達同自由黨張宇人等人，未捱到預算案讀完，就要入前廳回氣。街工梁耀忠謂，自己九五年任立法局議員以來，從未試過預算案發表期間離座半步，但尋日真係頂唔順，當佢入到前廳，赫然見到有四、五個議員喺度攤抖回魂，原來大家同佢一樣，被呢份沉悶至極嘅預算案搞到嗌救命！

鬍鬚曾最後仲拋書包引述一名詩人話：「偉大的市民成就偉大的城市。」唔知一個只係識吹爛水嘅財政司司長同一本廢話連篇嘅預算案，對香港有乜影響呢？