中環出更：林建康組團遊愛沙尼亞

當晚前來撐場嘅政商界名人逼到現場水洩不通，基本法委員會副主任梁愛詩一早嚟到，發展局局長林鄭月娥、前民政事務局局長何志平夫婦都現身支持。Matthew一班老友好似恒隆集團主席陳啟宗、大家樂集團主席陳裕光、香港專業及資深行政人員協會會長胡曉明、先施百貨董事總經理馬景煊伉儷、保良局副主席鄭錦鐘夫婦等人，個個都話未去過愛沙尼亞玩，話遲啲要叫Matthew組團去玩餐飽。長實執行董事趙國雄「趙樓神」就爆料話，Matthew計劃六、七月組團去考察，到時佢一定跟大隊去，因為佢廿年前去過一次，好想舊地重遊。

賣花讚花香 推介古堡景觀

Matthew嘅太太黃寧艷同大仔都嚟撐佢，見佢成晚忙到滿場飛，但佢不忘「賣花讚花香」，勁讚愛沙尼亞首都塔林好靚、好浪漫，至今依然保持十四世紀古堡景觀，就好似細個時睇卡通片、公主推開城堡迎接王子嘅場景。Matthew話，當地啱啱喺年初加入歐元區，又係歐盟成員國，所以香港特區護照都有九十日免簽證，佢上任後將大力推動兩地喺科技、船務方面嘅合作，自己都會去視察有冇投資機會。

馮國經女兒馮詠儀夫婦都有去撐場。

馬景煊夫婦拍住拖盛裝而至。

立法會議員林健鋒前晚都喺度，原來佢都出任過愛沙尼亞駐港名譽領事，由九八年做到○四年入立法會才卸任。佢極力推介當地旅遊業，尤其是塔林係北歐線郵輪必經之地，咁啱青年事務委員會主席陳振彬行過，佢猛點頭話：「係呀！」原來佢試過坐郵輪登陸塔林，力證當地美不勝收。

陳啟宗（右）同久違了嘅何志平（左），都嚟湊熱鬧。

唔再做最低工資委員會嘅陳裕光，當晚都難得露面。右為趙國雄。

卓妮