君子愛財，取之有道，用之有道，所以話，聚財固然重要，但善用財富更加重要。香港當正新加坡係假想敵，樣樣都想同人哋鬥，可惜次次都失威。呢，淨係理財呢樣，人哋知財善用，港府守財如命，已經高下立見啦。
新加坡啱啱公布新一年預算案，雖然預計會出現赤字，但照樣大手筆推出利民紓困方案，幫國民抗衡通脹，總值超過四百億港元。方案包羅萬有，包括向低收入國民派發現金、提供退稅減稅優惠等，令窮人可以分享經濟增長嘅成果。計起上嚟，新加坡政府開倉紓困，幾乎人人有份，個個受惠，正一皆大歡喜。
開講有話，唔怕唔識貨，最怕貨比貨。新加坡政府無懼財政見紅，依然慷慨開倉，果然有承擔，呢啲咪叫以民為本囉。相比之下，港府唔單止冇財赤，仲有巨額盈餘，但係就撳住個荷包一味做守財奴，簡直係肉酸夾難睇。
唔怪得多位學者及經濟專家不約而同炮轟港府「備而不善用」，孤寒到極。有專家估計，庫房今年會有八百億元盈餘，令財政儲備增至超過六千億。專家仲踢爆，按現有嘅儲備水平，「要三個金融風暴先使得晒」。庫房水浸，學者及專家異口同聲促請港府推出紓困措施，包括百分百退還薪俸稅，還富於民，以及善用盈餘，為低技術工人創造就業機會。
講到還富於民，人哋新加坡呢次可以話「貼錢扶貧」，做到加零一。而港府拒絕扶貧紓困不特止，財政司司長曾俊華仲離譜，對低下階層嘅苦況視而不見，仲大講風涼話，為政府一毛不拔百般狡辯。
鬍鬚曾早排喺個人網誌大放厥詞，話香港冇「官富民窮」呢回事，又話呢種觀點係挑動官民間唔存在嘅矛盾，完全係擘大眼講大話，亂噏廿四。請問，港府坐擁二萬幾億元外匯及財政儲備，肥到連襪都着唔落，但全港依家仲有一百二十萬窮人連溫飽都成問題，有數以十萬計打工仔月薪唔到六千蚊，咁唔係「官富民窮」係乜嘢？仲有，聯合國報告白紙黑字寫住，香港堅尼系數冠絕全球發達經濟體，貧富懸殊排名第一，咁唔係「官富民窮」又係乜嘢？
正所謂，言有招禍，行有招辱，香港有冇「官富民窮」，市民有眼睇，鐵一般嘅殘酷現實擺喺眼前，唔係鬍鬚曾靠狡辯、發官威就可以否認嘅。高官個個年薪幾百萬，但香港喺佢哋管治下，窮者愈窮，富者愈富，計功夫茶話齋，真正「挑動官民矛盾」嘅，係呢班同市民離心離德嘅庸官就真。
古人話齋，為政不在多言。鬍鬚曾與其嘥咁多口水死撐，不如學新加坡，花多啲心思諗下點樣回應市民訴求，快快趣趣推出切實可行嘅措施，幫香港人渡過難關仲實際啦。