港府堅拒將新交通津貼計劃改為「雙軌制」，令到好多居住喺偏遠地區嘅基層打工仔喪失申請交津資格。有網民尋日就借今早舉行嘅渣打馬拉松賽，寸爆煲呔曾同勞工及福利局局長張建宗負責揸旗嘅新交津計劃。
煲呔曾喺馬拉松賽舉行前夕透過facebook抽水，自爆尋晚會早啲瞓，不過並非為參加今早比賽，只係要主持起步禮。佢又主動提起兩、三年前嘅一齣電影，話電影男主角做事永遠半途而廢，不過最後呢位男主角透過參加馬拉松賽重獲鬥志，贏得美人歸。只可惜煲呔曾至今都係「等收工」態度，無法贏取市民歡心。
煲呔曾又喺文章大談長跑好手嘅「撞牆」（體能臨界點）經驗，話只要成功克服撞牆，牆嘅另一面就係海闊天空，不過就冇講煲呔曾最擅長嘅「撞板」。呢篇文章旋即激起大批網民回應，但大部分唔係講緊馬拉松，而係借題發揮鬧政府，例如有人話：「支持！大家跑多啲，跑步返工，咪唔使申請交通津貼囉。」亦有人坦言冇興趣睇煲呔曾跑馬拉松，想睇佢掃街或者瞓街多啲。