政情：吳永嘉嘆靚茅台難求
近幾年價格升勢勁過股票嘅內地高檔白酒茅台酒，過年前出現嘅缺貨荒仲未緩解，價格扯高兩倍不特止，有錢都買唔到添。更誇張係空樽都有成百蚊身價，因為不法分子用嚟裝假酒，真係無所不用其極。
我哋日前見到香港茅台之友協會副會長岑永生同秘書長吳永嘉，兩人都話茅台產量冇得大幅擴充，但相信炒高個價只係短暫現象。
過年需求量大增
吳永嘉話，近排由於過年關係，送禮自用嘅需求突然大增，所以市面上五百毫升裝嘅茅台，由一樽千零蚊叫價至三千幾蚊。佢解釋話，缺貨皆因呢樽矜貴國酒一定要喺貴州省茅台鎮，以當地水質再配合微生物、濕度先至能釀出甘香佳釀。以前酒廠試過去其他地方設廠，最後都係失敗而回，加上茅台需要幾年時間去發酵，係純天然靚酒，所以冇得隨便增產。
酒廠供應畀協會嘅係藍色包裝，俗稱「藍茅」。吳永嘉話，兩個月前佢哋啱啱帶咗百幾樽「藍茅」去台灣訪問，喺台北同高雄搞咗兩場「茅台之夜」，成班茅台發燒友一掃而空，大家盡興而歸。