政情：嫻姐被迫入市做房奴
香港樓價高人盡皆知，一向作風硬朗嘅工聯會副會長陳婉嫻尋日出席該會一個有關房屋政策嘅論壇時就提到，香港樓價驚人而且升得快，搞到啲業主即使出租物業都只肯簽一年約，因為怕樓價突然飆升出唔切貨。正因為呢項安排，搞到嫻姐由灣仔走到西環都租唔到屋，最後被迫要入市買樓，認真慘情。
樓價狂飆難簽長租
我哋報道過，嫻姐住咗廿年嘅舊居，舊年一月畀發展商睇中成幢收購。呢層樓係佢同家人共同擁有，放咗後嫻姐同家人周圍搵屋搬，起初佢哋想買番灣仔區嘅屋，不過舊年咁啱樓市又升溫，搞到啲業主不斷反價甚至封盤。嫻姐氣上心頭，把幾火打算租屋算數，點知由灣仔到西環所有睇啱嘅單位，全部業主只肯簽一年租約。為咗唔想搬來搬去，最後冇租到。
嫻姐話，呢件事搞到自己好頭痕，結果喺親友規勸下，佢同家人最終被迫入市做房奴，認真無奈。嫻姐有感而發話，房屋問題一定係未來特區政府最急需處理嘅問題之一，不過佢亦唔期望煲呔曾呢個看守政府有咩作為喇，只好期望下個特首做好啲。