政情：郭太阿姐善心撐長者
姊妹除咗談天說地、吃喝玩樂之外，一齊做善事都係好唔錯嘅選擇。人緣極佳嘅新鴻基地產非執行董事郭炳湘夫人李天穎，由佢擔任名譽贊助人及理事會主席嘅「生命熱線」尋日舉行「義」網絡嘉許禮，宣傳「珍惜生命，一個都不能少」嘅訊息，郭太自己身體力行嚟支持，佢老友阿姐汪明荃亦有到場，除咗嚟幫義工同服務使用者打氣，又教長者做「長者護心法」。好少喺商場開金口嘅佢，仲即場唱咗首歌畀大家聽，認真畀面。
除咗阿姐，郭太嘅好姊妹仲有美心飲食集團創辦人伍舜德媳婦伍蔡勉儂同麥少嫻，兩位名媛捐咗四圍枱出嚟請長者食飯，相當有心。郭太出席完嘉許禮，仲孖住幾個姊妹行去義賣嘅長枱買嘢，以最實際嘅方法支持「生命熱線」。
買福袋送禮自用
郭太未揀貨就先捐五百蚊入善款箱，再慢慢睇貨，之後揀咗幾包麥餅、福袋、雨傘同行山拐杖，又放多張一千蚊入善款箱。最搞笑係福袋入面有個放大器指甲鉗，方便長者使用，郭太見到一口氣買咗五個福袋，仲幽默話自己有老花，送禮自用都啱。