政情：發叔交棒囝囝屯門攝位？
鄉議局正副主席劉皇發和林偉強分別失落屯門鄉事委員會同離島鄉委會主席寶座，火燒連環船，令佢哋兩個嘅當然區議員以至區議會主席身份都無埋，需要進行改選，爭上位嘅戲碼隨即上演。花開兩朵，各表一枝，今日我哋集中講吓發叔退下來後嘅屯門區會主席之爭。本來盛傳現任區會副主席梁健文會乘勢崛起；不過，最近江湖傳聞，發叔有意由大仔劉業強接棒，以便自己日後東山再起。
同梁健文爭櫈仔
自從上星期屯門鄉委會通過修章、禁止做過兩屆主席嘅人冧莊後，發叔肯定要起身走人，連帶佢以鄉委會主席進身為屯門區當然區議員、再選為區會主席嘅經脈亦被打斷。以民建聯喺屯門區會卅七名議員中佔十二個，加埋隱形建制派同委任議員，區會主席幾乎成民建聯梁健文嘅囊中物。如果現任離島區會副主席民建聯周轉香都成功攞埋林偉強嘅區會主席位，咁十八名區會主席就會有半數係民記嘅人。
驟然失去幾項公職，發叔前日現身立法會時神態自若，仲笑住話依家自己好似佢領呔上嘅蝴蝶圖案咁「飛吓飛吓」，將來仲多番啲時間湊孫添。發叔貌似看開，心裏可能充滿不捨之情，聽講佢下月一日最後一次主持區會大會時，將發表感人演說，與此同時暗中拉攏盟友捧劉業強上位接棒。
劉業強現時係屯門區委任區議員，聞說發叔有意由乖仔暫攝主席大半年，直到今年底區會改選完畢；如果政府肯委任發叔做區議員，咁發叔就可以名正言順重返區會，繼而重掌主席寶座。話就話民選區議員輸咗唔可以被委任，但發叔係當然區議員，自然另當別論。
我哋就此傳聞分別向發叔同劉業強求證，發叔叫我哋問吓劉業強，劉業強又話唔清楚件事，叫我哋問番發叔，總之兩人都不置可否。不過有發叔支持者話，其實政府都想留住發叔，事關發叔一走，屯門區會頓變群龍無首，所以都想由劉業強暫時頂上。究竟劉皇發葫蘆裏賣嘅係咩藥，大家不妨拭目以待，相信一切喺四月一日新一屆鄉委會委員上任後就會明朗。