中環出更：杜振源20年後重投飲食業

鎮店紅酒值238萬

GOLD餐廳同本身寶號名稱一樣以金、黃兩種顏色為主題，設計氣派不凡，一入門口就係酒吧區，讓客人先品嘗餐前酒再享用晚餐，餐廳更設有露台，讓客人感受戶外氣氛。愛好葡萄酒嘅Simon仲將自己珍藏嘅一支1945年Chateau Mouton Rothschild五公升裝紅酒放喺餐廳，作為鎮店之寶。呢支酒當年限量發行二十四支，現時市值高達二百三十八萬港元，飲一支，少一支。

當晚Harlan為拍檔Simon特別安排多款精選菜式招呼朋友。Stephen最欣賞配上意大利西西里島海鱸魚及血橙嘅Carpaccio（薄片生肉），大讚海鱸魚新鮮爽甜，血橙夠特別，帶出海鱸嘅鮮味。Simon特別推介嘅龍蝦海鮮湯，就用法國龍蝦、日本長腳蟹、洋葱、薯仔、番茄等材料熬足一小時，Simon特別吩咐要少油，配合港人口味。另外幾味菜式都好夠水準，包括美國科羅拉多州羊扒、意式鮮番茄麵包配火箭菜、意大利餃配火腿及黑松露等。

咁上等嘅佳餚，當然唔少得靚紅酒。Simon預備咗三支靚酒，其中兩支係法國布根地（Burgundy）Domaine de la Romanee Conti（DRC）酒莊嘅1999年及1991年紅酒。Stephen一睇就知99年嗰支最好，事關年前有幸訪問DRC酒莊，莊主話要儲呢隻牌子，最好年份係1999年。呢隻酒已買少見少，好多酒窖無貨，炒到幾萬元一支。

1945年Mouton Rothschild五公升裝紅酒，係GOLD嘅鎮店之寶。	法國布根地DRC酒莊嘅1999年（左）及1991年（右）靚紅酒，每支價值過萬港元。	番茄包配火箭菜
科羅拉多州羊扒	法國龍蝦海鮮湯	海鱸魚薄片生肉

曾遭爛賭拍檔拖累

講番Simon進軍飲食業，原來佢廿年前曾投資廿萬元經營熟食排檔，後來為幫朋友，頂多幾間嚟做，點知遇人不淑，遇啱個爛賭拍檔，輸到連幾間排檔都用嚟抵債，最後仲要上門向佢追債，經驗慘痛。廿年後嘅今日重操故業，與Harlan拍住上，佢好有信心搞得成功，仲打算以「GOLD」呢個品牌，開多幾間唔同菜系食府。

Simon最近接替Stephen擔任小母牛籌委會主席，今年目標籌一千萬元，遲啲打算喺「GOLD」搞籌款晚宴，相信又係一場精彩盛事。

卓妮