政情：李少光爛gag撐孫公
教育局局長孫明揚因一場「直資風暴」，被立法會政府帳目委員會以「極度遺憾」炮轟，為避風頭，尋日立法會大會有一條口頭質詢，內容係關於年輕性罪犯激增嘅問題。條問題嘅內容又「年輕」又「性罪犯」，由孫明揚定係保安局局長李少光回答，本來都好難分，最後由李少光一力承擔，成為箭靶。
喺尋日嘅立法會會議上，提出質詢嘅教育界議員張文光批評，性犯罪年輕化，與性教育嚴重脫節有關，孫公點可以當唔關自己事。其他議員輪流發炮，質詢港府求其搵個局長敷衍議員。光哥搞gag打圓場，話性罪行年輕化，唔止係保安問題，仲係社會嘅問題，似足粵語殘片對白：「都係社會嘅錯！」引發哄堂大笑。
「極度遺憾」 同病相憐
光哥捱義氣，其實自身難保，審計署報告對孫公打一大巴，對光哥都打一小巴，報告炮轟全港戒毒中心入住率不均，保安局尋日一樣被帳委會「極度遺憾」一番，即係話，光哥同孫公其實係難兄難弟。