政情：中總青委團拜超蕸冇到
中華總商會青年委員會尋日喺中總會所舉行團拜午宴，四十幾位活躍分子共聚一堂，仲有抽獎添，大家開心到不得了。青委主席金利來主席兼行政總裁曾智明（Ricky）一早嚟到，一眾副主席王振宇醫生、彭楚夫、黃楚恒同埋林智彬亦都現身同樂。雖然副主席何家二房女兒何超蕸冇現身，但佢不忘捐出紫砂茶壺供大家抽獎。
林智彬呻內地缺勞工
中總係本港老牌商會，好多由父輩打下江山嘅家族企業，已漸漸由新世代接班。不過，依家喺內地設廠普遍面臨請人難嘅問題，點解決都幾考驗班後生仔嘅智慧。家族經營玩具生意嘅林智彬，係福建幫全國政協林銘森嘅公子，佢就同卓妮呻話，佢哋喺廣東嘅廠房，原本請一千名工人，但春節後工人有去無返，依家得番六百人，但定單多到爆棚，都唔知點算好，遲啲可能要將部分生產線搬入內陸城市。
腸胃科醫生王振宇聽罷笑言，做醫生就冇做生意咁煩喇！事關經濟景氣好，啲人食得太多搵佢，經濟唔好精神緊張，都係要搵佢。