政情：田少發功圖收復旅界議席
港澳旅遊業踏入兔年煞氣重，女導遊「阿蓉」同內地遊客打完交，澳門又爆發內地惡遊客毆打當地導遊風波，其實喺中環立法會呢個戰場，都一樣風起雲湧。阿蓉事件成為各路人馬爭逐旅遊界議席嘅籌碼，大家爭住發言，現任代表謝偉俊同疑似挑戰者旅遊業議會主席胡兆英早已暗鬥連場。正當大家
住自由黨何時出手之際，該黨榮譽主席田北俊尋日終於出招。
田少尋日以旅遊發展局主席身份現身旅遊界講座，台上為業界指點香港旅業出路，會後返到台下，就為自由黨收復旅遊界議席失地鋪橋搭路。就近期發生多宗內地旅客與香港導遊爭執事件，曾狠批「宰客」導遊影衰香港人嘅田少，尋日突然口風大逆轉，話發生爭執，未必錯在導遊身上，內地客參加「八千蚊五個人嚟港」嘅團，可以得到乜嘢服務，心中有數啦，唔應該欺負帶團導遊。田少呢番言論，同佢上年中炮轟「惡女珍」破壞香港旅業形象好唔同。
田少挺完導遊，再挺中小型旅行社，指留意到阿蓉事件中，內地男亦有出手，卻獲賠錢返鄉過肥年，有可能助長「旅霸」風氣，日後若有導遊被襲，宜找警方處理，誰是誰非由法庭裁決。至於有傳涉事嘅友佳旅行社向惡客賠錢十二萬蚊，田少話不作揣測，但能夠庭外和解，總好過對簿公堂咁話。
向中小旅社施冧功
田少突然向全港導遊同中小型旅行社施冧功，同立法會選情有莫大關連。據聞，自由黨已部署明年派出前旅遊業議會主席何栢霆出戰立法會旅遊界。○八年一役，旅遊界約有一千三百張公司票，當中以中小型旅行社為主，謝偉俊能一舉奪走呢個自由黨盤據多年嘅議席，相傳就係靠呢個票源撐住，本身係大行捷旅假期董事總經理嘅何栢霆若然明年出戰，田少梗係要幫手提早冧定呢班選民先啦。
其實，田少嘅「進取」攻勢，亦係為勢所迫。自阿蓉事件後，港府醞釀整頓入境團同導遊業嘅決心更大，而「法律超人」謝偉俊則站喺業界一方，同港府對着幹，日前仲被指自導自演一場被商務及經濟發展局局長劉吳惠蘭恐嚇「小心政治前途」嘅白色恐怖劇，儼如化身業界代言人，如果田少依家唔開始發功，恐怕日後發力已為時已晚，但不惜以打倒昨日的我嚟冧業界，是福是禍未可料也。