有道是：「水至清則無魚，人至察則無徒。」如今要加多句：數口至精則無財爺！鬍鬚曾年年預測政府收支，年年都錯到離晒譜，所以話數口精就做唔到財爺。你怪佢成日計錯數，佢至叻噴句：「咁有乜好嘅提議啊？」如此這般大懵到只剩下錢，咁就做咗三年財爺。
有心水清者踢爆，鬍鬚曾過去制訂預算案的流程與招數，可謂如出一轍：大鑼大鼓做一輪諮詢，收集民意；然後風騷賣廣告，同時出本漫畫。之前係咁，今次又係咁，普天之下，去邊度搵呢啲筍工？
再講，民意又係問唔出新意，除了派糖還是派糖，說白些，最好派現金加勁退稅，這是主流民意，根本不必假諮詢。更令人莫名其妙的是，年年主調都係「紓解民困」，不明因由的，可能以為係非洲窮國的預算案，否則庫房金銀在，何須感嘆深？政府就是愛整色整水，彷彿唔紓解就如便秘般唔舒服，冇民困就冇大志，突出唔到預算嘅艱辛。
老朽發現，鬍鬚曾每年預算案發表前夕，都可以用「非常傷感」去陳述：年年示威衝着財爺，都係提醒佢忌做守財奴，非常傷感；示威者總要提醒佢通脹猛於虎，而財爺僅派給市民兩支波板糖，非常傷感；請願團體送苦瓜給鬍鬚曾以表心聲，佢拒收還叫請願者「拎番去煮」，如此剛愎自用，好易車毀人亡，非常傷感。做財爺驚派糖，一如做戰士驚揸槍，G模博上鏡驚露肉，非常傷感。
通脹惡化，春節將至，基層生活難捱，政府如有點民心我心，咪成日關門數銀紙，非常傷感。