政情：容永祺遊日變新聞人物
旅行奇遇多，全國政協委員容永祺（Samuel）早前到日本公幹旅遊，順道拜訪新潟縣中國總領事，買埋火車票向日本東北進發，抵達火車站一刻，遇上罕有列車事故，引來日本電視台爭相訪問，Samuel無端端上日本電視，成為新聞人物。
訪東北遇列車癱瘓
卓妮上周四喺香港會撞見Samuel食晏，講起呢次奇遇，仍然猶有餘悸。佢話，新潟縣中國總領事早前發信邀請佢見面，Samuel正想趁此公幹機會，順道認識呢位新朋友。公幹完畢後，佢買定翌日朝早九點半火車飛，坐一百分鐘子彈火車去見對方，可惜抵達火車站時，撞正嚴重列車事故，往東北線列車全線癱瘓。Samuel喺火車站呆等一粒鐘，都係冇着落，旅程最後告吹。
返到酒店，Samuel突然接到友人來電，話喺日本電視新聞見到佢。打開電視一睇，原來佢同太太被困新潟縣火車站嘅無奈表情，全部上晒電視，令佢哭笑不得。
探唔成老友，想話shopping補番數，Samuel同太太四圍逛減價名店，點知行遍各大時裝店，都係撲空。原來日本男士身形纖瘦，西褲尺碼偏細，喺香港屬中碼身材嘅Samuel，竟然買唔到褲，揀來揀去，最後只買到兩條日本品牌西褲，總算不枉此行。