中環出更：男友送耳環伍穎梅冧爆
「九巴金公主」伍穎梅（Winnie）自從同中建企業董事許晉平拍拖之後，無論幾時都帶住幸福甜蜜嘅笑容。早前卓妮喺明天更好基金活動見到佢，呢位幸福公主戴住一對設計好靚嘅耳環，綠色嘅翡翠襯埋閃鑽，令人不禁睇多兩眼。
生日禮物 特別訂造
Winnie話，呢對耳環係佢上個月嘅生日禮物，朋友特登訂造嘅，佢好鍾意，所以成日戴住。卓妮唔為意問佢係邊位朋友送嘅？點知Winnie淨係識笑，個樣好冧。喔！大家明啦！
講起呢對男友許晉平送嘅耳環，Winnie盛讚設計好特別，無論襯正式嘅衣着或者牛仔褲都得。原來Winnie好鍾意戴耳環，平時唔返工嘅時候又好鍾意着牛仔褲，許生果然係細心之人，為至愛度身訂造耳環，都考慮得咁周到，咁Winnie無論係返工時同佢喺中環撐枱腳，定係放假時拖手仔行街街，都可以成日戴住對耳環囉！