政情：議員圍毆隱形副局
街工立法會議員梁耀忠尋日提出質詢，批評自從政府委任咗班副局後，一眾局長有如攞咗免死金牌，有藉口唔見議員；班副局又有樣學樣，約都唔肯見。佢仲酸溜溜質疑班副局「親疏有別」，同某啲議員零舍親近，親自接見，對某啲議員就永遠只用email或電話溝通。言下之意，暗寸班副局偏袒建制派，冷待泛民啦。
梁耀忠會後仲爆料，點名批評食物及衞生局副局長梁卓偉，話喺營養標籤問題上，約來約去都約唔到佢傾。
公民起動何秀蘭喺會上都批評運房局副局長邱誠武令佢最激心：「無論係西營盤太陞樓、機場的士定係菜園村收地，需要佢用權力特事特辦時，佢次次都唔出現，又唔覆電話，再唔係就搵公務員出嚟做擋箭牌！」
政制及內地事務局局長林瑞麟尋日就出面為邱副局長救火，話喺芸芸副局長之中，邱副局長出席立法會會議嘅次數，排名第二，可見佢看重同議員之間嘅溝通喎，唔知班副局長聽完林瑞麟呢番話後，會唔會為自己少出席立會會議而暗喜呢？