政情：陳家強唔同大輝黐手
有留意立法會新聞嘅朋友可能會發覺，廠商會代表林大輝次次發言總會提及到《稅務條例》39E條，話現行規定對工商企業有好大影響，希望當局修訂，不過早已畀政府以「違反稅務原則」為由拒絕。但大輝就死心不息，尋日再度提出口頭質詢，質問財經事務及庫務局局長陳家強點解唔見佢，條問題本身已經有公器私用之嫌，點知佢仲死咬住陳家強唔放，逼到陳家強黑臉反擊。
陳家強一開始已講得好清楚，話修訂39E牽涉重大稅務原則，無再檢討空間，點知大輝就鬧佢「拖、推、避、㩒」，係標準嘅無良官員。陳家強唔能夠陪佢發爛渣，惟有繼續重複呢個問題冇得再糾纏。同屬「五散人」嘅保險界代表陳健波眼見情況鬧得咁僵，惟有出面打圓場，半笑半認真咁質問陳家強話：「你係咪驚大輝有暴力傾向先避而不見？」搞到眾議員當堂爆笑，陳家強都忍唔住笑埋一份。
