政情：洪為民蔡菜子不敵冷鋒打敗仗
香港進入流感高峰期，咪以為離開香港就無事，唔少人最近為咗北上開政協會議，就不敵當地冷鋒而中招，傷風有，發燒亦有，全部嘆句：呢個冬天真太冷！
Witman高燒唔肯打吊針
北京人大、政協「兩會」三月開鑼，但各地省市自治區「兩會」已經開咗波，港區委員要冒住嚴寒北上開會，其中身兼寧夏回族自治區政協委員嘅菁英會常務副主席洪為民（Witman），上星期以第一副團長身份，帶互聯會專業人員協會訪京四日，星期五華北地區被冷鋒侵襲，氣溫急降，星期六佢就患上感冒同咳嗽。
星期日Witman再轉去寧夏首府銀川開政協會，當地氣溫更加降至零下廿幾度，冰天雪地，Witman病情雪上加霜，發高燒至攝氏三十九點九度。不過，洪為民唔肯入醫院打吊針，只肯自己食藥，好彩翌日凌晨退咗燒，跟住第二朝早餐仲可以食羊雜碎暖身，夠晒華北風味。
北上開政協會時不敵病魔侵襲嘅，仲有福建省政協委員「蔡菜子」蔡素玉，佢尋日喺香港出席一個活動時姍姍來遲，一嚟到就做蒙面超人戴口罩，到儀式尾聲，佢仲除低口罩當眾「啪丸」食喉片，一問之下，原來佢上福建開政協會，舟車勞頓之餘，加上當地室內室外溫差大，結果中招冷親。