政情：毓民大舊醞釀退黨
社民連內訌好可能正式演變成分裂。創黨主席黃毓民同陳偉業社民連兩位立法會議員，將於本周日同佢哋領導嘅兩個地區支部黨員開會，密謀集體退出由佢一手創立嘅社民連。屬於毓民陣營嘅前社民連副主席李偉儀今日會召開記者會，再次數臭現任主席陶君行，為周日退黨大會造勢。
毓民已經唔妥陶君行好耐，之前透過愛將「維園阿哥」任亮憲發動倒閣，但最後以六四得票之差失敗而回，之後佢改為質疑阿陶去過夜總會、處理任亮憲涉強姦案失當等，計劃發動第二次倒閣。但以前喺民主黨搞開倒閣嘅阿陶，亦絕非省油的燈，早已做足防備。毓民深知再次倒閣亦未必成功，有消息話佢已下定決心退黨，甚至會即時另起爐灶，關鍵係有幾多人跟隨。
據聞周日開會嘅主要係由毓民同大舊領導嘅九龍西同新界西支部，約有百多名成員，即上次支持倒閣嘅原班人馬，連同大舊本人及麥業成共有兩名區議員。至於割據新界東嘅立法會議員梁國雄以及阿陶領導嘅九龍東支部，就影響不大，名副其實係東西大分裂。港島支部方面就比較混亂，一早同毓民反咗面嘅阿牛曾健成會留低，任亮憲同「老鹵男」錢偉洛等則會跟毓民走人。睇嚟社民連分裂難以避免囉！