政情：關愛基金開爐打瀉鑊粥
由「條條fing」政務司司長唐英年主理嘅關愛基金尋日開動機器投入運作，轄下民政小組委員會召開首次會議，環視會場，社福界人強馬壯，除轄下委員社聯方敏生同社區組織協會主任何喜華外，連隔籬福利小組委員、社福界立法會議員張國柱都嚟列席監場，情況頗唔尋常。據悉，原來基金內部運作亂糟糟，民政小組幾乎淪陷，成為社福界爭奪資源嘅困獸鬥室，而一切禍端都源於唐唐一個決定。
關愛基金最高決策架構督導委員會，下設教育、醫療、福利同民政四小組委員會，各掌一億元撥款，分管所屬範疇嘅資助項目，其中民政小組委員會預咗要盡收前三者都無法歸類嘅個案。本來四小組委員會各歸其類，委員各展所長，井水不犯河水，點知唐唐領導無方，令呢個架構運作「跣胎」走樣，出軌亂衝，正逐步駛向車毀人亡嘅邊緣。
據了解，唐唐最初為關愛基金延攬委員時，四小組嘅名單俱定，各司其職，但有委員可能睇穿唐唐為人「條條fing」、凡事無所謂嘅性格，問佢能否自由轉組，果然，唐唐欣然接受，結果四小組委員會即變無掩雞籠，其中民政小組委員會被社福界委員長驅直入，亂事四起。
自由轉組 埋下生亂禍根
眾所周知，方敏生係社聯行政總裁，點秤都應該加入福利小組，但唔知係咪社福界見福利小組已經冧夠友，足以主導大局，於是派出「悍將」方敏生空降民政小組，與何喜華聯手爭資源。尋日小組委員會開會，本身係福利小組委員嘅張國柱仲列席會議，社福界聲勢浩大，對民政小組其他委員咪話唔構成壓力。
有關愛基金成員私下批評，唐唐打開四小組自由轉組缺口，為民政小組埋下生亂禍根。佢預期，社福界冧友入民政小組，審理資助項目，好大機會以社福界嘅利益為先，將民政小組委員會變成福利小組委員會「Ｂ隊」，日後經小組委員會批出嘅項目，隨時惹嚟非議，幸虧政府同督導委員會早有默契，就係所有合資格個案，將遞交由唐唐做主席嘅督導委員會裁決，等唐唐承擔番呢個政治責任。
民政小組委員會尋日會議全程務虛，只講推動弱勢社群等融入社區一類方向性政策，但日後到討論具體撥款項目，社福同非社福界委員隨時開火，基金運作一鑊粥，震撼性當然唔可以同美國眾議員槍擊案相提並論，但相信都夠唐唐孭黑鑊。