中環出更：人民幣升值張忠柟肉赤
人民幣近半年又再發力升值，加埋內地菜價、物價乜都狂升，令背靠內地嘅香港百物騰貴，普羅市民感受深刻。不過，珠海學院校長張忠柟仲難受，佢話次次見到人民幣匯率，佢個心就係咁滴血，事關珠海學院正在建新校舍，好多建築材料都來自內地，次次找數時乜都貴啲，難怪佢咁肉赤。
上周卓妮喺一個新春酒會見到張校長，佢精神唔錯，講起珠海喺屯門舊咖啡灣起緊嘅新校園就好開心，直言佢初初調任嚟港時，都冇諗過會遇上學校咁有歷史性嘅發展機會。不過，近排人民幣升值又再成為中美兩國角力議題，張校長好幽默咁話，佢見親人民幣匯率個心就滴血，好驚最終唔夠錢找數。張校長又話，學校又唔可以立亂加學費，將財務壓力加喺學生身上，所以都好頭痛。
好彩依家工程經費差唔多籌夠，政府提供免息貸款三億五千萬元加配對補助金，只係爭少少就夠數，問題不大。佢又報喜話，新校舍嘅工程進度順利，預計可以如期明年竣工，到時學院就可以正式升格為大學喇！