中環出更：肥胡「太鹹」輸畀梁栢賢
醫管局每年都會搞傳媒聚餐，邀請醫療界記者同醫管局高層聚一聚。今年就搞搞新意思，搞咗個俊男美女廚房，由新任總裁梁栢賢（PY）同主席胡定旭及九龍東聯網總監雷操奭，分別拍住傳媒代表獻廚藝，卓妮都去開開眼界。
肥胡以一分之微輸咗畀PY，屈居第二名。肥胡平時識飲識食，設計菜式都別出心裁，其他兩隊煮平民化嘅番茄牛肉炒蛋，但肥胡就搞搞新意思，煮咗味鴛鴦餸出來，一邊係紅椒洋葱炒雞柳，另一邊係黃綠椒炒肉片。不過調味落得太重手，評判話鹹得滯，扣咗少少分，似乎肥胡好耐冇下廚咁喎。
PY慶幸冇娶記者
至於PY就贏在菜名有心思，叫「型男索女迎雙十」，同醫管局二十周年應晒景。不過佢見到個個女記者都煮到有啲雞手鴨腳，就話好彩當年冇娶記者做老婆，否則肯定無啖好食嘞。
肥胡一講起食就眉飛色舞，透露自己有兩個關於食嘅心願，一個係出書，由佢去挑選全球每一個城市必食嘅一間餐廳，介紹有咩最好食。另一個係開餐廳，邀請城中公認廚藝最了得嘅廚師，每個禮拜去佢間餐廳煮一晚；間餐廳每個星期只會開三晚，每晚只開幾枱，廚師可以慢工出細貨，客人又可以同廚師多啲互動。不過肥胡咁忙，分身不暇，唔知等到幾時至可以圓自己心願呢？