中環出更：張德熙夫婦力撐國情研習
為加深港人對國情嘅認知，由金銀業貿易場理事長張德熙太太、前博愛醫院主席伍翠瑤擔任創會會長嘅國情研習促進會，前日隆而重之舉行成立大會，逾四百位城中名流撐場，場面熱鬧。晚膳後眾人移師一樓劇院欣賞講述中美兩國兩百年前首次接觸嘅經典話劇《中國皇后號》，真正寓教育於娛樂。
張德熙話畀卓妮聽，兩年前中聯辦新界工作部曾組織數十人北上研習國情，佢負責帶隊做後勤，太太係班長。後來大家覺得應該將呢種友誼延續落去，於是催生咗促進會。促進會未正式成立已開始做嘢，早前就帶隊去深圳參觀被港人視為炸彈嘅大亞灣核電廠，結果好多人對大亞灣改觀。
促進會淨係顧問團都有幾十人，星光熠熠，包括霍英東二仔霍震寰、金利來行政總裁曾智明、全國政協委員王國強、婦協主席林貝聿嘉等。同為創辦人嘅醫管局主席胡定旭、立法會議員林大輝、全國人大代表李宗德亦都現身支持。
前來捧場嘅政商名流數都數唔晒，有基本法委員會副主任梁愛詩、衞生防護中心總監曾浩輝、民政事務局副局長許曉暉、新民黨副主席史泰祖等。由於伍翠瑤做過博愛醫院主席，張德熙現時仲係博愛顧問，所以博愛高層亦都嚟撐場，張氏伉儷嘅政商實力由此可見一斑。