中環出更：李剛拖男帶女溫馨Shopping
農曆新年將至，唔少政商界名人嘅仔仔女女都回港過春節，一家人食餐團年飯最高興。卓妮尋日下晝三點鐘，喺中環ifc間citysuper遇到一身樸素西裝嘅中聯辦副主任李剛，見佢同一對後生仔女選購貨品，最後自己推住一大車食品到收銀處以金卡付款，全程完全冇保鏢或助手保護和代勞，親力親為無架子。期間李剛同個後生女有講有笑，態度相當親切，唔知呢對後生仔女同李剛有乜關係呢？
李剛付款後，三人挽住一袋二袋行出超市門口，當行到麵包櫃位時，停低睇咗一陣，之後見到售賣熟食日式炸物，又掏出一疊一百元現金購買。見李剛用手指喺透明櫥窗點選食品，佢買嘅食品應該係日式炸雞件、吉列黃金炸蝦及天婦羅炸軟殼蟹，以三人食量計算，每樣買啲都要過百元。
親力親為拎戰利品
買完食品後，李剛就親自攞住一袋二袋，帶兩個後生仔女行落扶手電梯到地下商場出口，原來已經有部掛住內地車牌嘅黑色豐田ALPHARD豪華七人車喺路邊等候，司機及助手隨即打開車尾門擺放幾大袋食品，佢哋之後登上座駕離開。卓妮見車尾放置咗多件行李，估計呢對後生仔女啱啱由外地回港，唔知會唔會留喺香港過農曆新年呢？
卓妮上前同李剛打招呼，作為中央官員嘅佢毫無架子，話買完嘢準備返屋企。問李剛喺農曆新年期間會否外遊，佢就笑一笑，話仲未諗到去邊喎，離開前仲笑笑口同卓妮講再見，又祝卓妮新年快樂，態度相當友善。
雖然李剛話返屋企，但見佢傍晚又着住套筆挺西裝出席一個新聞團體嘅慶祝酒會，都咪話唔頻撲。