政情：發叔屙足幾日要入院
近排鄉事派核心人物頻頻抱恙，繼早前鄉議局副主席張學明入院做心臟「通波仔」手術後，身兼行政會議成員嘅鄉議局主席劉皇發日前又感冒加肚屙入院。話說發叔喺英國嘅孫仔孫女放聖誕假返港，於是一家人暢遊馬來西亞，由於當地氣溫與香港相差二十度，令發叔一冷一熱患上感冒，搞到缺席上周二行會及周三立法會大會，提問要由同屬經濟動力嘅梁劉柔芬幫手讀出。
本應患上感冒多加休息就能痊愈，但發叔愛孫心切，同埋孫仔孫女、家人及朋友共三十幾人，齊齊去九龍塘一間私房菜打邊爐，大家食完無事，但抵抗力弱嘅佢就事後肚屙，仲係屙足四、五日嗰隻。據聞發叔啲仔女好擔心，所以安排佢入院休養，直至肚屙到完全清晒為止，所以發叔尋日無現身行會，估計今日立法會大會亦不會出席，相信要到周五嘅內會及財委會先現身。