立法會後日就表決申亞撥款，多名問責高官繼續輪流拍片，扮運動健將死撐申亞，尋日輪到政務司司長唐英年同特首辦主任譚志源，同香港羽毛球前一姐陳念慈同新一姐葉佩延，合演一場混雙羽毛球賽，點知就變咗反面教材，暴露晒兩人平日缺乏運動，最後仲畀陳念慈暗寸番轉頭。
短片經過精心剪輯，影唔到兩名高官跣腳、拗柴，或者頻頻打出界同打空氣嘅場面。不過唐英年就喺賽後訪問中，一路喘住氣同滴晒汗咁話，自己早前同女兒對打時整傷咗隻左腳，成條韌帶差啲斷晒。譚志源就自言以前讀書時成日打羽毛球，即係畢業後就好少打喇！難為段片嘅旁述仲大讚兩人「好快就回復狀態」、「表現有板有眼」。
陳念慈之後話，今次同高官作賽都好開心，因為可以「等佢跑吓」，又話今次申亞不論成功與否，對體育界嚟講其實已經贏咗，因為可以引起社會討論香港嘅體育發展，好過以前完全冇人講，暗寸港府過往推動體育不力。