政情：田少派叉燒飯牙齒當金使
回朝救亡嘅自由黨榮譽主席田北俊，上月預告會落區向長者派發叉燒飯，做番啲地區工作，果然牙齒當金使，尋日起一連四日喺沙田河畔花園間「叉燒大王」，向六十歲以上已登記嘅長者派發愛心叉燒飯（小圖），首日已經派出一百七十二個，喺嚴寒天氣下為長者增添暖意。
活動喺下晝五點鐘開始，師傅斬叉燒，田少就在旁幫手載飯，但被黨主席劉健儀（Miriam）笑佢手腳慢。
Miriam細心剪叉燒
田少幫咗一陣手後，就將熱辣辣嘅愛心叉燒飯送到長者手上，又同Miriam分頭坐低，一邊食叉燒飯，一邊同長者傾偈，期間Miriam仲擔心啲叉燒太大件，拿起刀剪幫長者剪細啲叉燒，認真細心。問Miriam會否擔心派叉燒飯會被人質疑與選舉有關，佢話呢啲係政黨關懷社區工作，與其他黨派搞蛇宴嘅性質唔同。