政情：社民連內亂恐一拍兩散
社民連內訌分裂已係不爭事實。繼早前倒閣、新花都同會址基金連串醜聞後，最新戲碼就係連社民連嘅公司註冊都鬧雙胞，劇情精彩過連續劇。有人質疑現任主席陶君行靜雞雞幫社記註冊係為鋪後路，萬一他日被倒閣亦可夾埋社記個名走，但陶君行就反斥有人「心裏有鬼」，想另起爐灶，先會突然走去公司註冊處翻查資料，仲公開要求前黨主席黃毓民停止無理取鬧搞分裂。誰是誰非都好，但一個黨有兩個權力核心，睇嚟都有排搞！
網上最近流傳一份公司註冊處文件，講述社記喺舊年十月分別註冊咗兩間名為「社會民主連線有限公司」同「新社會民主連線有限公司」。文件流出後，屬於「黃派」嘅兩名副主席即時發表聲明，話對事件絕不知情，網友亦質疑阿陶有心搶走社記個朵。
陶君行尋日為事件解畫，話社記一直循政黨化發展，將佢註冊為公司係必經階段，行委亦討論過有關事項，質疑有人小題大做，無風起浪，心中有鬼：「你無端端點會去公司註冊處check社民連有冇註冊？係咪你自己想另起爐灶咋？」矛頭直指近期表明要拉佢落台嘅黃毓民。
阿陶又炮轟毓民自舊年九月開始，多次無理取鬧，先係漠視會員大會共識，突然要求黨退出泛民協調機制，搞到內閣無奈讓步；其後又多次無理攻擊阿陶嘅內閣，勢要搞到黨員歸邊先開心。佢直言，近月內訌令社記大受打擊，唔單止冇時間做正經嘢，佢自己更隨時抽身唔選區議會，專心做好黨內協調工作。佢要求毓民控制吓自己情緒，做嘢要有分寸。
毓民另外成立新組織
阿陶直言自己無意落台，亦唔會另起爐灶，但毓民另一邊廂拉攏黨員成立新組織卻已成事實。毓民近日自行夥拍黨友陳偉業，同選民力量及前綫等組織成立咗一支「聯合部隊」，計劃喺選舉狙擊民主黨。據悉，毓民拉咗唔少社記黨員加入，成支「部隊」現已有五十名會員，毓民同大舊仲會出任發言人。
毓民尋日冇覆我哋電話，不過與佢同一陣線嘅大舊話，社記早已講好唔參與協調機制，故佢哋做緊嘅嘢無違黨紀，唔需要知會黨主席陶君行。佢仲炮轟行委會得幾丁友都搞內訌，個個有唔同說法同意見，叫阿陶搞好自己個內閣先好管佢哋喎。黃派陶派勢成水火，呢場權力鬥爭，睇怕只會愈來愈精彩，大家拭目以待。