中環出更：周國豐夫婦戴錶首選名牌
周國豐（Brandon）同太太Jenny係社交圈模範夫妻，不時拍拖去ball，啱晒key。講到戴錶，兩人心有靈犀，首選名錶。Brandon喜歡款式classic嘅IWC，Jenny就鍾情鑲滿閃鑽嘅Vacheron Constantin江詩丹頓。
Brandon鍾意戴boysize錶，早前出席皮草比賽，就以IWC嘅Big Pilot腕錶襯西裝。Big Pilot係IWC飛行錶嘅旗艦項目，雖然唔係戴住佢揸飛機，Brandon覺得一樣好玩。佢話揀錶首選大錶面，愈大愈好，但錶殼就千祈咪三尖八角，太誇張喎。
Jenny手上嘅江詩丹頓，係家人送嘅，價錢幾多就唔講嘞。酒桶形錶殼設計，鑲滿多粒美鑽，溫柔地緊貼手腕。江詩丹頓係世界各地藝術收藏家心目中嘅瑰寶，Jenny就鍾意佢既華麗又保值，出街shopping時，佢喜歡以牛仔褲襯鑽石錶，表現smart casual一面；有ball去時，就以晚裝襯江詩丹頓，閃爆全場。