中環出更：孫啟烈朱玲玲玩具話當年
有玩具嘅地方，就會搵到童真。亞洲最大嘅香港玩具展前日喺灣仔會展開幕，除工業總會主席孫啟烈坐鎮外，城中玩具廠家都蜂擁入場，包括玩具老行尊嘅前工業總會主席丁午壽、外號「中國變形金剛之父」林亮與立法會議員林健鋒兩父子、玩具大王蔡志明兒子蔡加讚等，連行外嘅「最美麗港姐」朱玲玲都到場湊熱鬧，大家仲即興暢談童年玩具。
孫啟烈嘅童年時代，要追溯到幾十年前。佢話細個只係踢吓膠波、玩吓公仔紙，但到佢囝囝嗰代就幸福得多，可以儲齊一套「星球大戰」電影嘅公仔玩具，至今到佢一歲嘅孫女就更加幸福嘞，玩具多到玩唔晒，而且好多玩具都具有教育意義。孫啟烈現時有孫萬事足，但佢話有孫唔怕多，愈多愈好，仲講明新抱生一個，佢就會獎一個，仲係獎現金，多多都有獎喎！
啟剛三兄弟玩遙控車
卓妮都有問朱玲玲童年有乜玩具。佢話細個喺緬甸長大，城市相當落後，幾兄弟姊妹只喺屋企花園追追逐逐，間中爸爸有機會到香港公幹，就會買公仔返緬甸畀佢玩，啲公仔儲到咁上吓，佢就以不同角度同啲公仔合照。唔知朱玲玲嘅攝影興趣係咪嗰陣時培養出來嘅呢？到佢三個仔霍啟剛、啟山、啟人呢代，朱玲玲話佢哋多數玩遙控車。
雖然孫啟烈同朱玲玲只係閒談童年玩具，但正好說明香港玩具發展不斷進步，至今憑着優質產品及多元化種類贏得世界讚譽。