中環出更：獲理大院士 洪小蓮淚不停
女人，成日畀人話係水做嘅。有眼淚，女人可以滔滔不絕，淚灑當場。李嘉誠基金會董事洪小蓮（Katherine）尋日獲理工大學頒發大學院士，感性嘅佢，喺台上致辭時數度哽咽落淚，真情流露，博得全場掌聲。
Katherine以理大校友身份攞獎，格外興奮，老公梁光建及囝囝梁承傑專登嚟恭賀。見慣大場面嘅Katherine目睹成班老友嚟打氣，一開腔致辭就感動到喊，幾乎講一句喊一次，台下嘉賓為之動容。Katherine多次深呼吸忍淚，終於完成演辭，引來哄堂掌聲。
佢散場時話，冇諗過自己咁水皮，但一諗到成功女人唔易做，既要努力，又要有能力，仲要識得排解壓力，淚珠就決堤湧出。
楊敏德上海度歲
理大校董會主席楊敏德感同身受，頒獎時同Katherine抱頭擁抱。楊敏德都係重情之人，農曆新年將與媽咪返家鄉上海度歲，好期待燒炮仗同放煙花。
佢自爆童年放煙花趣事多，曾點着手上煙花唔肯放手，搞到燒傷手，好stupid喎。
除咗Katherine外，仲有七位傑出人士齊獲獎，包括著名設計師劉小康（Freeman）。Freeman喺設計界獲獎無數，尋日致辭時不忘多謝恩師靳棣強。靳叔桃李滿門，佢笑言收徒弟條件好簡單，就係講緣分。
話說Freeman當年無意中喺街上見到靳叔畫嘅美術課程招生海報，從此立志做設計師，理大畢業後考入靳叔嘅設計公司，一做就三十年，Freeman做埋恩師公司嘅合夥人，感情亦師亦友。
同場仲有理大校長唐偉章，唐校長日理萬機，嚟緊新年都無假放。何解？原來佢計劃帶隊訪問美國西岸多個著名大學，包括加州大學等，傾吓加強師生交流，新年後出發。所以話，大學校長真係唔易做㗎！