彩雲二邨南洋杉恐塌
綠化本可美化屋邨，可惜一旦「種錯樹」則會令居民人心惶惶。王伯指彩雲二邨原種有兩棵南洋杉，最近發現兩樹樹身嚴重傾斜，「有咩理由喺條邨入面種呢種樹㗎，樹幹咁幼，但就成五六層樓咁高，仲要斜晒都冇人理！」王擔心大樹隨時倒下，危及居民。
屋邨物業管理公司發言人表示，南洋杉具有朝向陽光生長、爭取更多陽光的特性，因此會影響樹身形態。發言人又承認早於今年四月已得知兩棵南洋杉已有傾斜現象，但樹木仍屬健康，故只於樹身周邊用鋼繩輔助固定，避免繼續傾斜。
長春社總監蘇國賢指南洋杉附近若有高樓大廈，會令光線不均勻，使南洋杉傾斜生長，「房屋署最初揀樹種明顯冇周詳考慮！」蘇更強調樹木健康並不代表沒有倒塌危險，「佢哋應該要檢查樹木結構同地面有無凸起先啱！唔係一句健康就算！」