財政司司長「鬍鬚曾」曾俊華閒時都會寫吓網誌，不過經常不經意令自己露底。向來有玩劍擊嘅鬍鬚曾，尋日喺網誌講佢幾十年來嘅玩劍史，仲話玩劍往績即使十戰九敗，如果喺關鍵時刻果敢出劍，都有機會反敗為勝喎。玩劍尚且如此，查實諗深一層，鬍鬚曾嘅政績，又何嘗唔係十戰九敗呢？
近年樓價狂飆，唔單止豪宅，就連平平實實嘅中小型住宅都畀炒家炒到飛起，市民個個哭訴上唔到樓，雖然鬍鬚曾喺今年多次出手壓抑樓市，但所出嘅卻全屬虛招，成效有限，究竟佢使出咗果敢嗰一劍未呢？
鬍鬚曾面對殺到埋身嘅通脹及拖拖拉拉多年嘅港台合作等問題，一樣無甚建樹。鬍鬚曾嚟緊就只有下年財政預算案呢個翻身機會，且看正就此進行緊民意諮詢工程嘅佢，能否「果敢出劍」，急市民所急，令自己不致落於「十戰十敗」嘅慘況啦。佢又話「只要你肯投入去做，是一定能得到回報的」，不過有時資質所限，投入同回報都未必一定成正比。