政情：盧文端赴台豪過新年
「福建幫」頭領、全國政協委員盧文端好識享受人生，每逢長假期都會「一拖四」帶埋太太、細女Amanda、外父同外母去旅行，好似今年農曆新年就去過新加坡，七月暑假又去歐洲及地中海郵輪假期，每次都豪華到極，試過最多豪花幾十萬元。盧文端一家尋日又出發到台灣六日，原來去台灣都可以好豪。
盧文端話，今次台灣團由旅行社精心安排，全程坐頭等機位，入住五星級酒店，仲有專業導遊及專車接送，未計膳食每人團費已需一萬多元。
盧文端已經多次遊台灣，本月初先至赴台參加茅台酒之夜，同多位台灣政界猛人同枱暢飲，但因為Amanda未去過台灣，所以做廿四孝父親再去一次。
Amanda早已聽聞台灣地道小食好出名，所以好期待今次台灣之旅。盧文端自己就好欣賞珍珠奶茶、花生湯、鬆脆蠔仔煎、台中嘅蠔仔麵線，佢話就算香港有得食，都未及台灣嘅水準。
多款小食中，盧文端特別欣賞台中嘅蠔仔麵線，佢話係非一般麵線咁簡單，因為加入以雞血及糯米釀製嘅豬大腸，只要將豬大腸煎一下，就已經令人回味無窮。