政情：張華峰料港股將破三萬
港股月前爆升一輪後掉頭下跌，反映市況實在難以預測。不過，曾經預測年底港股見二萬五千點嘅恒豐證券董事總經理張華峰繼續做大好友，雖然目前仲差二千一百多點才達標，但佢仍然預測農曆新年後嘅港股會穩步升到三萬一千點。張華峰嘅預測信唔信得過就等大家自行決定，但其愛駒「創新高」月初率先爆冷跑出，贏得四十七萬元獎金。
張華峰話，雖然近期港股反覆，但佢認為唔會有太大轉變，如果美國再推出新一輪量化寬鬆政策，勢必刺激港股上升，相信農曆新年後開始會穩步上升到三萬一千點水平。不過，呢個水平接近○八年金融海嘯前嘅高位，係咪衝得過呢個心理關口，就要拭目以待。問張華峰點睇黃金投資，佢話黃金無利息，亦估計金價差不多見頂，倒不如搵啲優質股投資好過喎！
其實股市氣氛唔差，但聖誕假前都跌咗唔少，好多股評人都唔明點解。樂觀係好，投資時小心啲就得喇。