政情：曾德成全年無所事事

德成局長話，香港人今年印象最深刻嘅係港隊單車選手黃蘊瑤忍住肋骨破裂嘅傷痛，爬番起身負傷應戰，最終得到銀牌嘅一幕。局長愈講愈興奮，話體育競賽可以將一個人同團隊，甚至一個地方嘅精神好似火光咁迸發出嚟，進而對人心造成更大嘅激勵，形成難以估計嘅力量。

局長成篇文足足用咗三段去講亞運，其餘大約兩段篇幅就涵蓋咗兩位彰顯無私大愛，去到內地做義工但不幸喪生嘅港人黃福榮、曾敏傑，同埋菲律賓人質事件等等真正嘅「大事」。局長話，菲律賓人質事件發生後，香港人表現出團結同理性，呢啲情況同樣令佢感動咁話。

攞牌比人質事件重要!?

睇到呢度，相信大家都明白德成局長想講乜，重重複複原來又係力撐政府申辦二○二三年亞運，可以話毫無新意。冇錯，香港運動員喺亞運有好表現當然值得高興，但講感動似乎點都唔及菲律賓人質事件中香港人紛紛伸出援手呢一幕啩？局長將亞運放喺最前，足以證明佢個腦已經畀「申亞」兩個字完全佔據，除此之外，佢都諗唔起仲有啲乜嘢值得一提。

申亞流產根本已成定局，政府仍然死心不息爭取支持，局長重複又重複咁曲線撐申亞，唔通除咗亞運會之外，真係冇嘢再值得德成局長關心？網誌最尾仲要加埋呢一句：「香港不只是一個創造了經濟奇迹的地方，還是個熱愛體育、勇於拚搏、互相關懷，而又充滿愛善之心、樂於扶助貧弱人群的地方。」民政事務局工作絕對唔只體育，局長喺回顧今年感動事件嘅網誌尾聲又再次用「體育」行頭，到底呢位年薪三百幾萬蚊嘅局長，今年全年做咗幾多嘢呢？讀者不妨自己研究一下。