中環出更：星屑醫生變花樣醫生
同「維園阿哥」任亮憲老友鬼鬼嘅「星屑醫生」歐陽英傑，前晚為香港西醫工會嘅聖誕派對「歌舞昇平聖誕夜」擔任司儀，身為工會會董嘅星屑醫生平時打扮新潮，不過佢前晚就搖身一變，着到官仔骨骨，加上風趣幽默嘅談吐，的確令到個派對生色不少。
星屑同我哋講，自己做司儀係即興演出，認為即興可以做得更活潑。佢前日一身深色嘅西裝，令到佢個綠色四葉草心口針顯得更加搶眼，星屑話，個心口針其實係佢送畀太太嘅禮物，不過前晚見好襯套西裝，所以特登借嚟戴吓。呢個心口針係由水晶鑲嵌而成，好閃，起咗畫龍點睛嘅效果。
睇咗成晚，硬係唔見星屑個太太，佢做乜咁衰撇低老婆去派對先？星屑笑住澄清，原來太太同家人去咗旅行，得番佢一個喺香港，所以先被迫單刀赴會。星屑嘅衣着其實一直都好前衞，例如佢會着住短褲加legging喺診所幫病人睇病，而前晚又係另一個造型，唔怪得佢叫自己做「花樣醫生」。