中環出更：扶老逛超市詩姐一腳踢
聖誕假期間，好多地方人頭湧湧，反而中環就相對冷清。基本法委員會副主任梁愛詩尋日無懼九度低溫，着住厚絨褸與家人齊逛中環置地嘅高級超市ThreeSixty。一向嚴肅嘅詩姐，喺家人面前絕對係個乖乖女，佢負責推購物車又攙扶老人家，連埋單畀錢全部都一腳踢。
北風襲港，令Boxing Day變得特別有節日氣氛。卓妮約咗老友打邊爐，諗住逛ThreeSixty掃貨，咁啱得咁蹺，撞正詩姐一行五人全女班行超市，嗰陣係晏晝五點幾，夠鐘買餸，莫非詩姐準備親自下廚？
買蔬果推車找數
睇真啲，與詩姐同行嘅，有一位頭髮斑白嘅老人家，輪廓同詩姐有幾分相似，一定係佢屋企嘅長輩，詩姐對呢位老人家好尊敬，邊行邊扶到實。
我哋曾經撞見過詩姐買朱古力，但呢趟行超市就無出手，反而集中掃新鮮蔬果，食得咁健康係有原因嘅，心水清嘅人應該記得，詩姐曾患腸癌康復，所以多食纖維質豐富嘅新鮮蔬果就啱嘞。逛到咁上下，詩姐推車行埋收銀處找數。
買咁多新鮮蔬菜，唔通返屋企打邊爐？詩姐笑而不答，但佢不忘送贈一句「Merry Christmas！」畀卓妮，佢後來say goodbye上車，應該係打道回府嘞。
講番間超級市場ThreeSixty，喺中環甲級商廈開超市，當然一啲都唔嘢小。佢號稱係全港最大嘅有機及天然食品店，除咗中環置地廣場之外，喺九龍嘅圓方都有一間。佢有崇高嘅宗旨，就係關乎生命、世界及未來（about our life, our world and our future）。
卓妮