熟食中心煲煙食署懶理
自去年九月《定額罰款（吸煙罪行）條例》實施後，食物環境衞生署職員即獲賦予權力，可向轄下二十五個熟食中心違例吸煙者直接票控。不過，條例生效後，熟食中心違規吸煙情況依然嚴重，加上長期巡查不足，食環署過去一年只發出十九張定額罰款通知書，熟食中心儼如「煙竇」。立法會議員狠批食環署有法不執，疏懶成性，令違例吸煙情況幾近失控。
梁先生每日均會前往深水埗北河街熟食中心午膳，雖然中心入口掛有大型禁煙區橫額，但不少食客仍無視禁令，「好多人一食完飯就攞支煙出嚟，大模廝樣咁食煙，咁耐都冇見過有食環署（職員）嚟過捉人，搞到成個吸煙區咁！」位於粉嶺的聯和墟熟食中心情況亦同樣嚴重，「嚟食嘢嘅係咁食（煙），喺度做嘢嘅伙記一樣食（煙），搞到成個熟食中心都煙霧瀰漫，咁樣禁（煙）法不如唔好禁！」曾先生過去亦為熟食中心常客，惟發現中心內違規吸煙問題嚴重，近日已減少前往。
除九龍及新界區的熟食中心外，位處港島的灣仔鵝頸熟食中心內，食客公然吸煙情況亦不相伯仲，記者現場所見，更有食客煙不離手，地上則滿地煙蒂。灣仔區居民陳先生不諱言，對上址食客吸煙已習以為常，「嗰度夜晚根本就冇人巡，大家咪唔理咁多，食煙都唔覺有問題囉！」
食環署發言人稱，自《定額罰款（吸煙罪行）條例》去年九月一日實施至今，職員在轄下熟食中心共發出十九張定額罰款通知書，其中在北河街熟食中心及聯和墟街市熟食中心分別發出四張及一張定額罰款通知書；鵝頸熟食中心則未有發出罰款通知書。
有法不執疏懶成性
發言人強調，職員除在熟食中心禁煙區作日常監察及執法外，亦有向經營者及顧客推廣禁煙訊息，亦不時與控煙辦採取聯合突擊行動，以收阻嚇作用。
「啲數字好明顯同事實有距離，食環署有法又唔執，疏懶成性，成年先得十九張告票，有冇可能呀！」立法會食物安全及環境衞生事務委員會委員王國興直言，難以相信食環署的執法成效，全港廿五個熟食中心只發出十九張定額罰款通知書，平均每個中心所發告票不足一張。王又稱，熟食中心為食環署轄下場地，職員有責任確保室內禁煙規定，「食環署根本冇藉口唔去理禁煙問題，唔夠人就加派調配，唔好搞到熟食中心好似無王管咁！」
條例授權指定人員執法
《定額罰款（吸煙罪行）條例》於二○○九年九月一日實施，凡在法定禁煙區或公共交通工具內違規吸煙、攜帶已燃點香煙、雪茄或煙斗者，除控煙辦督察及警員外，康樂及文化事務署、食物環境衞生署及房屋署的指定人員，均可向轄下管理場地內違例者發出定額罰款通知書，罰款金額為一千五百元。
記者 梁少儀