政情：陳健波行山補償愛妻
普天同慶嘅聖誕節又到啦！立法會「五散人」之一陳健波今年邊度都無得去，要留港向太太陪罪。事關波哥太太一早做足功課，準備同波哥去新加坡過聖誕，點知波哥丟唔低立法會工作，結果搞到機票、酒店都無晒嘅時候先至後悔，依家仲要諗計氹番老婆添！
今個年度立法會工作相當繁重，勤力見稱嘅波哥以為聖誕節都有會要開，放心唔落拋低去玩，所以一直唔敢應承太太去旅行。不過唔想波哥太辛苦嘅波太，早就諗住同波哥去新加坡環球片場玩吓，過番一個刺激嘅聖誕節。
不過，當波哥肯定聖誕無工作纏身，可以放心遠行嘅時候，機票同酒店都唔等人，全部滿座。始料不及嘅波哥當然被太太詐型，其實佢唔係唔想去，佢都想去睇吓新加波點樣由一個好悶嘅城市，變到今時今日咁多姿多采。依家忙於補鑊嘅波哥，初步諗住同太太行山度聖誕，相信波哥只要以誠意搭夠，佢太太都會收貨嘅！