政情：阿姐獲委任城大顧問
八和會館主席汪明荃一直熱心推動文化藝術發展，年前八和會館申請改建北九龍裁判院做粵劇文化中心失敗，搞到阿姐忍唔住鬧爆政府對粵劇界支持唔夠，鬼咁好火。不過近來阿姐同政府嘅關係修補咗好多，政府尋日就刊憲，公布委任阿姐為香港城市大學顧問委員會成員，明年一月一日生效，任期三年。
原來阿姐同城大好有淵源，城大喺○七年頒授咗個榮譽文學博士學位畀阿姐，表揚佢喺演藝文化界嘅成就同貢獻，今次做埋大學顧問委員會成員，阿姐就可以幫城大出謀獻計，推動校方未來發展，話唔定仲可以喺城大搞番個藝術課程，教吓班學生唱大戲添。
憲報登錯何「鐘」泰
城大顧問委員會同校董會、教務會一樣，係大學嘅法定組織，自○七年成立以來運作至今，為城大發展作出好大貢獻，顧問委員會嘅成員除咗大學人士，仲有唔少商界翹楚、社會賢達同城大好友，除咗阿姐之外，獲委任嘅成員仲有立法會議員何鍾泰等，不過憲報又出錯，誤將何鍾泰嘅「鍾」字寫成「鐘」字，變相幫佢改名，認真失禮，又要更正喇！