政情：黃碧雲上位入監警會
獨立監察警方處理投訴委員會（監警會）最新委任名單尋日刊憲，有十個新面孔，最令人眼前一亮嘅，係啱啱做咗民主黨中委嘅普選聯副召集人黃碧雲。政改通過，港府論功行賞，普選聯有份撐政改，黃碧雲喺今年七一授勳名單上無份，依家就多咗個公職銜頭，算係攞番個安慰獎。
去年六月起升格為法定機構嘅監警會，早前被本報揭露，委員出席率奇差，好似其中兩名身兼立法會議員嘅副主席林大輝同石禮謙，喺過去一年半時間缺席咗一半會議。不過，政府尋日公布嘅監警會委任名單，林大輝同石禮謙再度獲委任，希望佢哋以後監察警方之餘，亦好好睇緊自己嘅出席率。
至於教聯會會長楊耀忠等人，則消失喺新名單中，取而代之嘅係十位新面孔，其中有香港青聯常務副主席葉振都同慈善家方潤華兒子方文雄。最為政界熟悉嘅係黃碧雲，現為理工大學通識教育中心講師，佢自今年初加入普選聯後，人氣上升，早前做埋民主黨骨幹，依家又獲委入監警會，睇嚟佢撐政改無揀錯路。