政情：克勤仔北京過節撇低女友
歐洲多國刮起大風雪，但無損名人外遊心情，仲紛紛揀聖誕前夕起程。民建聯立法會議員陳克勤揀去北京做團長，行政會議成員劉皇發公子劉業強就寧願避寒，攜一家五口遊東南亞。
聖誕鐘響起，人潮逼爆機場，人海中，我哋撞見唔少老友記。克勤仔最早出發，朝早十點幾現身VIP通道，佢係立會議員，可以有特權。見佢着住薄皮褸，隨身行李只有一個小背囊，未見大包細包。去邊度玩？非也，原來係撇低女友，飛去北京公幹至真！克勤仔話，此行帶逾百個中學生上京，前往清華大學及北京大學交流，廿八日先返，即係聖誕節都要喺北京過，幸好女友明白事理冇詐型，返港後再補數。
劉業強東南亞避寒
到下晝兩點幾，離港人流依然不絕，唔少仲係一家大細。我哋又見到劉業強拉埋太太及三個仔女喺離境大堂現身，佢哋一家五口嘅大件行李已經寄晒艙，大家手fing fing好輕鬆，原來準備去東南亞度假，享受暖笠笠聖誕，過埋新年先返香港。
外遊名人中，仲有人稱「棉花公主」嘅行政會議成員楊敏德，今日佢將起程飛斯里蘭卡。喺當地設紡織廠，此行同囡囡潘楚穎巡視當地業務，順便考察早前捐款興建、用以協助南亞海嘯災民嘅醫院，認真善心。