政情：五副局長綁住守大本營
今日係聖誕節，又係特區高官放假遊埠症候群發作高峰期，尋日打開憲報一睇，三司十二局中，共有五個局長由今日起輪流放假，加埋喺廿七日至三十日休假嘅煲呔曾，特區政府三分之一真空。港府搵Rap歌歌手歐陽靖（MC Jin）crossover煲呔曾唱聖誕「起錨歌」，其實應該搵埋班局長做茄喱啡，高唱：「聖誕節又嚟臨，起錨……放假！」而五位「識歎」局長部下嘅副局長，就要喺聖誕新年假期留守部門，做署理局長，成為全港最貴嘅聖誕飾物。
每年聖誕節，班司局長都打崩頭放假，今年亦唔例外。過去兩年長期處於半退休狀態嘅煲呔曾，身先士卒，帶頭請假偷閒，政府新聞處尋日出稿，指佢將由後日起休假，下星期五先至返工，期間其職務由政務司司長「唐唐」唐英年署理。
煲呔曾休假，其內閣成員亦唔執輸，政府刊憲，嚟緊有五個局長放假。人稱「每周一鑊」嘅食物及衞生局局長周一嶽由聽日起攤抖四日，跟住後日輪到政制及內地事務局局長林瑞麟接力，政改本地立法暗湧四起，但林D9似乎無放喺眼中，休假到廿九日返工，之後一月五日又請假，到十日為止。
此外，商務及經濟發展局局長劉吳惠蘭、教育局局長孫明揚同環境局局長邱騰華，全部由廿八日起休假，劉吳惠蘭三十日返工，孫公同邱騰華就明年一月一日先至復工，五個局長齊齊趁聖誕新年起錨放假攤抖。孫公早前為一場教育界直資風暴搞到頭都大埋，加上年紀唔細，趁風暴暫時平息，佢又真係幾需要叉叉電、回回氣嘅。
焗署任冇假放
不過，有人歡喜有人愁。局長喺聖誕新年期間休假，部下五位副局長就要綑綁式留守港府，做署理局長，包括食衞局副局梁卓偉、政制及內地事務局副局黃靜文、商務及經濟發展局副局蘇錦樑、教育局副局陳維安同環境局副局潘潔，大家冇假放，真係多得佢哋幾位「識歎」嘅上司帶挈。