政情：葉劉抬高自己暗踩唐唐
立法會議員葉劉淑儀為擴大政治版圖，喺後政改年代率先成立新黨「新民黨」，雖然身為主席嘅葉劉唔肯透露新黨頭炮做啲乜，不過肯定嘅係，佢想將槍口對正一班政府高官，實行「鬧官洩民憤」。好似尋日佢上電台節目，原本就係同大眾分享吓對中國嘅情懷，點知講講吓，葉劉不點名燒埋一眾司長，暗指有人講乜都要睇稿，如果冇準備就口啞啞，唔知佢係想暗寸出名講嘢輕佻嘅政務司司長唐英年（唐唐），定係暗寸普通話水皮嘅財政司司長曾俊華（鬍鬚曾）？
葉劉尋日自爆，原來同武打大師葉問係同鄉，前排返鄉下，仲見到葉問後人葉準添。唔知係咪近朱者赤，所以葉劉喺政界特別打得呢？葉劉回憶喺中英談判期間，佢係香港第一批同中央交涉回歸細節嘅官員，當時負責接待一批中央要員嚟香港開會，葉劉話知道內地高官對香港嘅自助餐好有興趣，專登安排一行人到當時嘅富麗華酒店食自助餐，諗住當做洗塵宴，點知班中央官員隆重其事，個個着晒軍服到場，即刻嚇親班侍應，以為中國要提早收回香港，差啲鬧出笑料。
除咗要處理社交場合，正式嘅官方禮儀都唔少得，葉劉話當時成班高官排排企喺火車站迎賓之餘，突然仲要佢代表香港向中央官員致歡迎辭。毫無準備嘅葉劉當堂呆咗，不過見到佢哋已到埗，惟有硬着頭皮打天才波。葉劉話：「好在我嘅普通話都夠水平，加上唔使好似某啲司長咁要睇稿先講到嘢，所以最後都順利過關喎！」
句句有骨喎，到底葉劉講嘅係邊啲司長呢？相信平時聽慣佢鬧官嘅朋友一定估到。較早前唐唐喺立法會內務委員會寸盡各黨派議員時，葉劉已經指名道姓鬧爆唐唐懶幽默，「做七年官都冇進步」，如果唔係有人寫好稿畀佢，就成日「廢噏」，所以今次葉劉想鬧邊個，昭然若揭。雖然葉劉咁講有踩對手抬高自己之嫌，之不過如果班高官有真材實料，又點會咁易畀葉劉寸爆呀。
準備好選特首？
節目尾聲，主持人問葉劉係咪想落場選特首，佢即時顧左右而言他，話呢啲嘢「唔到佢諗」，又指自己好鍾意做嘢，如果適合自己、又可以服務到人嘅，都一定會做喎！一派「I am ready」咁款！