房屋署將於十二月十日為荃灣梨木樹（二）邨第二座展開三年一次的固定電力裝置系統定期檢查及測試，居民鄺小姐指出，當日大廈所有單位將於上午九時至下午六時暫停電力供應，不少設施均受影響，「電梯、食水同鹹水統統停晒，仲要全部一齊停成日，點解唔可以分開嚟停？」
公屋聯會主席王坤亦直指有關安排失當，影響範圍廣泛，對居民日常生活造成不便，「房署可以分段暫停，唔好為咗貪方便做測試，同一時間停晒咁多樣嘢，搞到居民冇水又冇電！」
房署發言人表示，由於測試涉及多個程序，且需更換部分組件，需時較長。但在許可情況下，當日會首先恢復電力供應，減少對居民的不便，預計全幢大廈室內電力供應於下午六時前恢復。屋邨辦事處已盡早於十一月下旬發出通告通知受影響的住戶及商戶作出適當安排，個別住戶如有特別需要，可聯絡辦事處職員。