民主黨主席何俊仁尋日五十九歲生日，特登將逢星期三都會進行嘅絕食提前，點知一班同佢出生入死嘅黨友竟然無心裝載，個個都唔記得！
無論係民主黨黨團召集人李華明，定係同仁哥一齊入中聯辦談判嘅張文光同劉慧卿，尋日被問到點同仁哥慶祝生日，第一個反應都係：「乜佢今日生日咩？」黃成智仲話連自己生日都唔記得，冇乜可能記得仁哥生日喎！最後都係李永達提議大家一齊出去同仁哥食飯慶祝，不過事情峰迴路轉，當大家開心食飯嘅時候，仁哥因為要喺立法會發言，所以冇去到。
其實仁哥為咗撐內地嘅維權律師，幾乎每個星期三都會絕食到夜晚九點，不過難得去到生日大日子，仁哥專登提早一日絕食，等生日正日可以同老婆撐枱腳添！但仁哥喺facebook度就留言話，從來都唔覺得生日值得慶祝，仲話喺內地有好多異見人士依然處處受限，所以最大嘅生日願望，都係希望人人都有選擇嘅自由喎！